社會近年積極推廣傷健共融，東華三院同賽馬會尋日合辦特殊馬拉松比賽，首次選址啟德跑道末端，有破紀錄三千名智障人士同伴跑員參賽。一眾政商界人士包括發展局局長陳茂波、社會福利署署長葉文娟、立法會社福界議員張國柱、東華三院主席施榮恆（Ivan）及馬會副主席周永健（Anthony）等，更首次擔任伴跑員，同幾十名智障人士齊齊跑一公里，最後由Anthony隊伍最先衝線。
施榮恆夥拍伯伯一齊「衝」
Ivan帶埋太太同囝囝出席活動，更夥拍最年長、七十四歲患中度智障嘅謝伯，以十五分鐘完成賽事。Ivan話，比賽時好擔心謝伯會跌親，全程(目及)實佢，更陪謝伯「衝」咗一段路。不過，Ivan更擔心七歲嘅囝囝落場因為跑得太快而四圍撞，所以唔畀囝囝落場。佢又話，囝囝年紀仲細，未必理解智障人士，要慢慢親自接觸過先會知道「有人會唔同啲」。
葉文娟開跑前透露，自己三十年前係田徑好手，專長為跨欄，今次落場要撻番着個Engine（引擎）先，Anthony就開玩笑向在場嘉賓大派定心丸，話自己一定會喺比賽中「墊底」喎。點知結果係Anthony一馬當先，第一個跑出，緊隨其後係陳茂波。因患惡性胃黏膜淋巴瘤、正在休養當中嘅張國柱，就得戚咁自己跑得快過葉文娟。
葉文娟三十年前玩過田徑，但好耐無開「引擎」。
張國柱操「平甩功」助復原
張國柱精神好又中氣十足，康復得咁快究竟有咩秘訣？佢就即席向葉文娟示範「平甩功」，即係每日連續做十五分鐘「甩四下手、膝頭再蹲兩下」嘅組合，話咁就可以放鬆心情，兼有助氣血循環喎。
2015年01月19日 東方日報 政情 中環出更 卓妮
李鳳山師父的平甩功標準示範
https://www.youtube.com/watch?v=_iQj_P896t8
李鳳山師父平甩功見證系列
6. 平甩體證 -- 乳癌
